Loading

MEÐGANGA OG FÆÐING

Pistill eftir h2 – hómópatana Guðnýju Ósk og Önnu Birnu en þær eru jafnframt höfundar bókanna Meðganga og fæðing með hómópatíu og Barnið og uppvaxtarárin með hómópatíu.

– – –

Kvenlíkaminn er merkilegt sköpunarverk, sem hefur þann eiginleika að geta gefið af sér þetta stórbrotna kraftaverk sem barn er. Hann hefur alla eiginleika til að aðlaga sig að breyttum aðstæðum á meðan hann hýsir kraftaverkið og breytir sér svo hægt og rólega í fyrra horf eftir fæðingu gullmolans.

Þrátt fyrir aðlögunarhæfni líkamans er hver meðganga og fæðing einstök upplifun og getur verið nokkuð breytileg, bæði líkamlega og tilfinningalega milli meðgangna. Það að vera barnshafandi er hjá flestum konum dásamleg upplifun, þó er það einstaklingsbundið og sumar konur upplifa sína meðgöngu erfiða líkamlega og jafnvel andlega. Það er mikilvægt að vera meðvituð um hvernig líkaminn breytist og fyrir alla muni að hafa það í huga að meðganga, sem slík, er ekki sjúkdómur eða veikindi heldur eðlilegt ástand og lífsins gangur. Svo framarlega sem konan er hraust, fer eftir heilbrigðri skynsemi, borðar hollan mat, hreyfir sig reglulega og hvílir sig vel á móti, ætti hún ekki að þurfa að breyta miklu í sínu daglega lífi fyrstu mánuðina.

Á þessu níu mánaða ferli líkamans og í nokkra mánuði eftir fæðinguna sýnir líkaminn margskonar einkenni. Í flestum tilfellum eru það tímabundnir og sem betur fer langoftast minniháttar kvillar sem ganga hratt yfir. Ef hlustað er á líkamann og brugðist við á jákvæðan og skynsaman hátt getur konan sjálf haft mikil áhrif á líðan sína.

Nauðsynlegt er að konan sé í góðu mæðraeftirliti frá a.m.k. 10.-12. viku meðgöngunnar, þar sem fylgst er með líkamlegu ástandi hennar. Algengir kvillar sem geta valdið konunni óþægindum eru til dæmis; morgunógleði og aðrir meltingarfærakvillar, brjóstsviði, blóðþrýstingójafnvægi, bjúgsöfnun, æðahnútar, gyllinæð, bakverkir og grindarlos. Í flestum tilfellum er ekki um alvarlega kvilla að ræða og þar gæti hómópatía svo auðveldlega komið að miklu gagni sem sjálfshjálp fyrir konuna.

Hómópatía er heildræn meðferð þar sem virðing fyrir einstaklingnum og einkennum hans er höfð í fyrirrúmi. Hómópatar byggja fræðin sín meðal annars á reglunni um að „líkt lækni líkt“, það þýðir að einkenni sem koma fram í „stórum“ skömmtum hjá heilbrigðri manneskju geta komið jafnvægi á „veika“ manneskju sé notast við örskammta. Sem dæmi um þetta getum við tekið einfalt dæmi um ofnotkun á kaffi. Ef við drekkum of mikið kaffi spennumst við upp og getum orðið andvaka. En kaffi, eins og önnur efni, getur komið jafnvægi á sömu einkenni og þau valda séu þau gefin í örskömmtum, þannig gæti hvatinn úr remedíunni Coffea, sem búin er til úr kaffibaunum, gagnast við svefnleysi.

Hómópatar notast sem sé við remedíur, en þær eru unnar úr jurta-, dýra- og steinaríkinu. Remedíur eru það mikið þynntar að ekki er talað um eiginlegt efni heldur hvata.

Eins og nefnt var hér fyrir ofan eru ýmsir kvillar sem geta valdið konunni óþægindum. Hér eru nefndar örfáar remedíur sem gætu gagnast þungaðri konu við nokkrum af þessum kvillum. Algengustu remedíurnar við morgunógleði eru til að mynda; Sepia, Pulsatilla og Nux vomica. Hómópatía getur verið svo breiðvirk þegar einkenni passa vel að þessar sömu þrjár remedíur geta einnig gert verulegt gagn við brjóstsviða og jafnvel fleiri einkennum sem konan gæti fundið fyrir.

Á lokavikum meðgöngunnar byrjar líkaminn að undirbúa sig fyrir fæðinguna sjálfa. Konan þarf þá að hvílast vel, huga vel að næringu og svefni. Meiri líkur eru á að allt gangi að óskum ef konan er vel úthvíld á þessum hluta meðgöngunnar og að hún sé í góðu andlegu jafnvægi.

Remedíur sem hafa reynst vel í fæðingarferlinu sjálfu eru: Arnica, Bellis perennis og Calendula. Við brjóstagjöf og brjóstabólgum má til dæmis nefna; Calcarea carbonica, Pulsatilla, Belladonna og Chamomilla. Einnig má hér nefna örfáar remedíur sem gætu átt við í fæðingarþunglyndi, til dæmis: Cimicifuga, Natrum muriaticum, Sepia og Ignatia.

Þar sem nokkur þúsund remedía eru til er nokkuð ljóst að ótal fleiri remedíur gætu komið til greina á meðgöngunni og í sjálfu fæðingarferlinu. Ávallt er best ef valin er remedía sem hentar einstaklingnum í samráði við hómópata en með útgáfu sjálfshjálparbókarinnar Meðganga og fæðing með hómópatíu er leitast við að gera konum auðveldar fyrir að hjálpa sér sjálfar á aðgengilegan hátt. Einkenni og kvillar sem fjallað er um í bókinni eru:

Morgunógleði • Bakverkur • Bjúgur • Blóðskortur • Blöðrubólga • Brjóstsviði • Depurð • Grindarlos Gyllinæð • Hægðatregða • Niðurgangur • Sinadráttur • Slit • Þreyta • Æðahnútar • Fæðing • Brjóstagjöf • Brjóstabólga • Fæðingarþunglyndi • Þvagleki • Þvagteppa

Hægt er að nálgast ýmsar hómópatískar remedíur í öllum betri heilsubúðum og er einnig hægt að nálgast ýmsan frekari fróðleik á www.htveir.is

– – –

h2 stendur fyrir hómópatana tvo Guðnýju Ósk og Önnu Birnu sem eiga sér draum. Draum um að sem flestir þekki hómópatíu, fyrir hvað hún stendur og geti notfært sér þessa náttúrulegu og mildu meðferð við flestum af þeim kvillum sem koma upp í daglegu lífi. Með það að leiðarljósi hófu þær ritun og útgáfu sjálfshjálparbóka um hómópatíu á íslensku til að koma til móts við aukna eftirspurn eftir heildrænum meðferðum íslendinga. Ásamt því að skrifa bækur, greinar og fróðleik um hómópatíu og annað heilsutengt efni, stendur h2 einnig fyrir námskeiðum og kynningum um hómópatíu.
Báðar námu þær hómópatíu frá The College of Practical Homoeopathy, í Bretlandi. Þær eru margra barna mæður og uppalendur.
Nú þegar hafa þær gefið út tvær bækur Meðganga og fæðing með hómópatíu og Barnið og uppvaxtarárin með hómópatíu. htveir heldur úti vefsíðu um hómópatíu og heilsutengt efni www.htveir.is og facebooksíðu Htveir hómópatíubækur.




Guðný Ósk nam hómópatíu við The College of Practical Homoeopathy, í Bretlandi, 1999-2003. Frá því að hún útskrifaðist sem hómópati hefur hún sótt ýmis námskeið, bæði hérlendis og erlendis, til að viðhalda og auka við kunnáttu sína. Hún átti sæti í stjórn Organon fagfélagi hómópata 2005-2007 og átti einnig sæti í stjórn Bandalags íslenskra græðara 2005-2006.
Tímapantanir í síma: 895 6164 eða í tölvupósti (gudnyosk”hjá”htveir.is).

Anna Birna nam hómópatíu við The College of Practical Homoeopathy, í Bretlandi, 2000-2004. Hún lauk námi í ráðgjöf hjá Ráðgjafaskóla Íslands árið 2007. Frá því að hún útskrifaðist sem hómópati hefur hún sótt ýmis námskeið, til að viðhalda og auka við kunnáttu sína. Hún átti sæti í stjórn Organon fagfélagi hómópata frá 2003 og var formaður þess frá 2005-2010 og einnig formaður Bandalags íslenskra græðara frá 2005-2008.
Tímapantanir í síma: 846 6382 eða í tölvupósti (annabirna”hjá”htveir.is).

X