Loading

FÓSTUREYÐINGIN MISHEPPNAÐIST – LÆKNIRINN DÆMDUR TIL AÐ GREIÐA MEÐLAG

Spænskur læknir var á dögunum dæmdur til að greiða meðlag með barni eftir að hafa framkvæmt misheppnaða fóstureyðingu á Spáni.

Móðir barnsins fór í fóstureyðingu þegar hún var komin sjö vikur á leið. Tveimur vikum síðar mætti hún í skoðun hjá sama lækni og framkvæmdi aðgerðina og sem fullvissaði hana um að aðgerðin hefði gengið að óskum og hún væri ekki lengur ófrísk. Nokkrum mánuðum síðar fór hún aftur á sömu læknastofu þar sem hún taldi líklegt að hún væri aftur orðin ófrísk. Þá kom í ljós að hún var gengin 22 vikur og ekki lengur hægt að framkvæma fóstureyðingu.

Stúlkan fór í mál við lækninn og var hann á dögunum dæmdur til að greiða meðlag með barninu til 26 ára aldurs. Upphæðin nemur um 160 þúsund krónum á mánuði en að auki var hann dæmdur til að greiða henni tæpar 23 milljónir króna í miskabætur.

Stúlkan sagði að þetta mál væri allt hið versta en það mikilvægasta væri að sonur hennar skyldi að þrátt fyrir að hún hafi viljað eyða fóstrinu á sínum tíma þá væri hann elskaður í dag og hún sæi ekki eftir því að hafa eignast hann. Drengurinn er 18 mánaða gamall og búa mæðginin hjá foreldrum móðurinnar.

Lögfræðingur konunnar, Eva Munar, sagði í samtali við The Guardian að málið snérist um vanrækslu í starfi og væri mögulega það fyrsta sinnar tegundar í heiminum. Búist er við að læknirinn muni áfrýja dómnum.

X